Ionad Hiort

Thathas a’ dol a rannsachadh mholaidhean le coimhearsnachdan ann an Innse Gall thairis air an t-samhradh, airson Ionad Hiort, a bhios ag amas air ‘spiorad ionaid’ an aon Làraich Dualchais mheasgaichte an t-Saoghail aig UNESCO a th’ anns an RA a ghlacadh is a chomharrachadh.
Tha Buidheann Obrach Hiort air Jura Consultants, agus Ailtirean Page/Park a chur an sàs, gus rannsachadh a dhèanamh air a’ chomasachd airson ionad inntrigeadh-iomallach a leasachadh airson dualchas nàdarra is cultarach Hiort a chomharrachadh. Tha a’ Bhuidheann-obrach airson dèanamh cinnteach gum bi gach buidheann aig a bheil ùidh ann an sàs sa cho-chomhairleachadh. Thuirt an Comhairliche, Aonghas MacCarmac, Neach-cathrach na Buidhne-obrach: “Tha mi air leth toilichte gu bheil an sgrùdadh air tòiseachadh. ‘S e prìomh chùis a th’ anns an t-suidheachadh: tha raon de dhiofar chothroman ann a thaobh suidheachaidh, agus tha sinn mar-thà mothachail air grunn choimhearsnachdan no goireasan stèidhte aig a bheil ùidh ann. Tha na co-chomhairlichean air dòigh-obrachaidh soilleir, òrdaichte is cothromach a shuidheachadh airson molaidhean a chur a-steach mun àite as fheàrr, agus bidh iad a’ gabhail na h-obrach seo os làimh rè an t-samhraidh.”
Gus dèanamh cinnteach gum bi cothrom aig na h-uile am beachdan a chur an cèill mu suidheachadh an ionaid, no air molaidhean a dhèanamh airson Ionad Hiort, thathas a’ suidheachadh fòram beachdachaidh aig www.stkilda.eu Faodaidh neach sam bith le ùidh ann a bhith a’ gabhail pàirt sa cho-chomhairleachadh fios cuideachd a chur gu colin@jura-consultants.co.uk

Tha àrainneachdan talmhaidh is mara Hiort air leth luachmhor agus chaidh an àrainneachd mhìorbhaileach nàdarra seo ainmeachadh mar Làrach Dualchas Nàdarra an t-Saoghail aig UNESCO ann an 1987. Ann an 2005 chaidh inbhe Làrach Dualchas an t-Saoghail a bhuileachadh a-rithist air Hiort. Bha seo air sgàth a dhualchais shònraichte chultarach, ga dhèanamh mar an aon Làrach Dualchas mheasgaichte an t-Saoghail ann am Breatainn agus aon a-mach à 25 san t-saoghal air fad. Tha Opara Hiort aig Pròiseact nan Ealan, a thèid a thaisbeanadh aig Fèis Dhùn Èideann, air stuthan ùra mu Hiort a ghintinn, agus air dearbhadh is dùsgadh a thoirt dhan ùidh shaoghalta ann an sgeulachd Hiort.

Tha riochdairean bho Urras Nàiseanta na h-Alba, Comhairle nan Eilean Siar, Iomairt na Gàidhealtachd is nan Eilean, Visit Scotland agus Pròiseact nan Ealan air Buidheann-obrach Ionad Hiort.

Bu mhath leinn ur beachdan mu Ionad Hiort a chluinntinn – mar a tha sibh a’ smaoineachadh bu chòir dha a bhith, far am bu chòir dha a bhith suidhichte agus beachdan sam bith eile a th’ agaibh co-cheangailte ris. Tha sinn airson cluinntinn bho na ghabhas de dhaoine is mar sin cleachdaibh a’ bheàrn seo airson beachdan fhàgail agus airson tilleadh a leughadh beachdan chàich bho àm gu àm.

Cumaidh sinn cuideachd fiosrachadh ribh mun adhartas a thathas a’ dèanamh. Ma tha sibh airson a bhith a’ faighinn ùrachaidhean cuiribh ur n-ainm an seo.